عبير العبد تكتب: شكرًا أمي حبيبتي
في عيدك أفتكرلك كل لحظة بطولة عملتى فيها حاجه جدعه وجميله عشان تسندينى وتوصلينى لتحقيق أهدافي وتعبتي معايا أنا وأختى دعاء وأخويا حازم جدًا من غير ما تزهقى ولاتشتكي ولا تبطلي بطولة لأنك بجد بألف راجل طول عمرك يا أمي مهما قولت مش هوفيك حقك يا جميلة ياست الكل ياعظيمة من عظيمات مصر.
أنتي يا أمي اتعرضتي لحاجات كتير صعبة علشان تربينا وتعلمينا وتفهمينا كل حاجة، بحبك أوي يا أمي وانحني شكرًا لكي وأكن لكي كل الاحترام والتقدير والعرفان بالجميل والمعروف اللي طول عمرك يوميًا بتعمليه معايا أنا وأخواتي بشكل عادي من غير ماتحسي أنك بتعملي شىء مش عادي.
لأ انتى مش عادية انتى بالفعل بطله ياأمى ومافهمتش كويس المجهود الغير عادى اللى بتقومى بيه يوميا وانتى تعبانه او مريضه او زعلانه او مخنوقه من اى ضغط عليكى من صعوبة الحياة.. مفهمتش الا لما جوزى مات واتعرضت لنفس الضغوط ..أمى انتى بطلة اقسم بالله.
كل ما أفتكر لما ابويا مات وانت شيلتى الليلة وكملتى ترببتنا لوحدك ورفضتى تتجوزى وانت مش بتشتغلى واكتفيتى بالمعاش بتاع بابا ومشينا على قدنا واهل بابا واهلك كبروا دماغهم وانتى كنتى ام واب وماحدش جنبك غير ربنا.. كل ما افتكر والاقى نفسي فى نفس الموقف احبك زاحترمك اكتر واكتر لانك علمتينى الرجوله والجدعنه والصبر والاستعانه بالله فقط وده اللى بعمله دلوقتى يا امى بعمل ذيك يا حبيبتى.
أنتى يا أمي حرمتي نفسك من حاجات كتير عشان تدينى اشترى كتب وملازم فى كلية حقوق عشان اذاكر وانجح وتشوفينى حاجه فى المجتمع واكون ليا دور العبه مش بس موجودة وخلاص، علمتيني يا أمى احب مصر واحب ربنا واتعامل مع المصريين كلهم انهم اخواتى وحبايبى وما افرقش بين الناس على اساس دينهم وادى روحى لمصر وانا راضية لانها وطنى وارضى وفيها اتولدت واتعلمت مجانا على ايد معلمين مصريين وبتعالج على ايد اطباء مصريين وعلمتينى احب كل الناس واسامحهم واساعدهم واقف جنب اى حد محتاج لوجه الله وما افكروش بعد كده عشان ثواب الجدعنه ما يضيعش.
اتعلمت منك يا أمى كل حاجه حلوه وكل تصرف ذكى واذاى اكون ضهر ولادى وافضلهم عنى وافكر فيهم قبلى وما أكونش أنانية.
أمي أنتى عطاء بلاحدود ونبع حب لا ينتهى ..انتى جميله قوى يا أمى شكلا وموضوعا وبطلة بكل المقاييس.. ربنا يطول فى عمرك ويديلك الصحه واردلك ولو جزء من بطولاتك وجدعنتك معايا انا وأخواتي يا ست الكل.. كل سنة وأنتي طيبة في عيد الأم يا أمي.. قبلة على رأسك وقبله ليديك الجميلة التي مسحت عرق جبينى لما أدخل من باب البيت وأنا تعبانة من الشغل في الصحافة وشكرًا لكلماتك اللي سندتني وقوتني أكمل صحافة وما أزهقش ولا أتعب ولا أمل ويفضل جوايا الإصرار على الوصول لهدفي.
كنتي يا أمي بتقولى ليا أنتى قوية بالله.. اوعى تضعفي لأنك هتوصلي لهدفك.. مازالتي بتديني الأمل كل يوم.. ربنا يبارك لي فيكي ويخليكي يا أمي، ما أقدرش أنسى كلامك ليا أنا وأخواتي وأولادي كل ما تبكي عشان أمهات الشهداء وأنتى بتقولى لينا كلنا لازم نبوس رأس أمهات الشهداء لأنهم ضحوا بأغلى ما تملك الأم والابن أوالبنت، ولاتملك الأم أغلى من أولادها مهما امتلكت.
كل سنة وأنتي طيبة يا أم الشهيد.. دي رسالة أمى ليكم بواسطتي.. اللي علمتني مصر غالية عليا أكتر من روحي.. شكرًا يا أمي يا حبيبتي.
مامتك تستحق جائزة الام المثاليه لأنها أنجبت استاذه جامعيه مصريه محترمه وربنا يحفظها ويبارك فيها ويحفظها من كل سوء ولا يحرمكم من دعاءها