شاهيناز خليفة تكتب: ليه اتعلقنا بزيزي؟!
يمكن مش أي حاجة بنشوفها بتشدنا أو بنتعلق بيها إلى لما تكون شبهنا أو شبه حد قريب مننا، تلقائيًا تلاقي نفسك حبيت الشخصية دي وتبدأ تهتم تعرف كل الحكاية ونهايتها بتكون إزاي ويمكن ده اللي حصل مع «زيزي» في مسلسل «خلي بالك من زيزي».
كتير مننا اتعلق بيها وبشخصيتها وتفاصيل حياتها ووصلت أنها تكون جزء أساسي من حياتنا وكمان المسلسل كان ترند طوال فترة عرضه في رمضان، مع كل حلقة بنشوفها بنلاقي تفاصيل غريبة ومتكونش متوقعة واللي وصلت لنا في النهاية أن فيه حاجة اسمها اضطراب نقص الانتباه مع فرط النشاط ADHD.
مع بداية المسلسل شوفنا واحدة متوترة، حياتها ملخبطة وهي كمان ذات نفسها ملخبطة، متهورة، متتوقعش هي ممكن تعمل ايه خلال الثواني الجاية، وفجأة شوفناها بتضرب جوزها وكسرت له العربية.
كثير من الرجالة على «السوشيال ميديا» شافوا أنها واحدة قليلة الأدب وأنها تتحبس باللي عملته ده، لكن كثير من الستات حسوا بيها وشافوا أنها مظلومة يمكن علشان بعض التفاصيل كانت أي ست ممكن تبى مكانها فهي فهماها أكتر.
ولكن مع تطور الأحداث والدخول في تفاصيل أكتر عن حياة زيزي وعائلتها وأصحابها، لاقينا أنها ضحية لأهلها وزوجها وأن محدش قادر يفهمهما لأن محدش قدر يعرف أنه عندها ADHD أو حاول يعرف سبب غضبها طوال الوقت.
يعتبر مسلسل «خلي بالك من زيزي» أنه الحصان الرابح في دراما رمضان السنة دي، مسلسل بيناقش قضية مجتمعية مهمة ودسم بالتفاصيل والمعلومات مش مجرد دراما بتتعرض والسلام، مسلسل مليان مشاعر كثيرة، مسلسل كلنا محتاجين نتفرج عليه سواء كبار أو صغار.
قدرت أمينة خليل كعادتها أنها تبهرنا بموهبتها التي لا خلاف عليها، قدرت توصلنا كل مشاعرها وتفاصيل شخصيتها بسهولة ومن غير تفاصيل معقدة، بساطة تمثيلها وتلقائيتها ومن غير مشهد ممل قدرت أنها تعيشنا الحالة اللي هي فيها علشان نقدر نحس ونفهم الناس اللي بتعاني من اضطراب فرط الحركة خاصة الأطفال اللي أغلب الأهل بيشوفوا أن دي شقاوة زيادة.
أما محمد ممدوح «مراد» قدر يقدم شخصية الراجل اللي بيدور على الحب اللي يكمل معاه لكن زي أي راجل بيتوه في النصف، ولكن بمجرد أنه قرب من أمينة خليل وعلى قد ما ساعدها حبها وحب طيبتها وجنانها وقدر يساعدها أنها تتعالج وتتخلص من غضبها المستمر ووقف جنبها في أنها تلاقي نفسها وتحقق حلمها.
وده عكس على قاسم «هشام عسل» الزوج الطيب بزيادة اللي رغم حبه الشديد ليها الأ أنه حبه كان ضرر لها، محاولش يساعدها كان بيخاف على مشاعرها لدرجة أنه محاولش يقولها أنه بيتعب من طريقتها وأنها لازم تتعالج، وسمح لواحدة تانية تدخل حياته ويخونها.
وطبعًا مش قضية أمينة خليل بس اللي شدتنا طوال المسلسل، لكن قضايا كتير ناقشها المسلسل بسلاسة ومن غير ملل، كل قضية منهم تتعمل مسلسل لوحدها ونركز عليها ونلقي الضوء عليها أكثر وأكثر، ودي طبعًا براعة الكاتبة والسيناريست مريم نعوم كعادتها بتقدملنا قضايا مجتمعية بأسلوب مميز دون أي إهانة أو تجريح أو تقليل من أي شخص.
مسلسل خلي بالك من زيزي علمنا حاجات مهمة جدا بنقابلها في حياتنا كل يوم وبنتجاهلها علشان مبدأ «خلي الحياة تمشي»:
– ان لازم الجواز يكون مبني على التفاهم والمشاركة لان الحب لوحده مش كفاية.
– مينفعش نفرض نفسنا على حد، أنت/ي تستحقوا تتحبوا بجد وتحسوا بالحب ده.
– أسوأ علاقة هي اللي شخص واحد بيبذل مجهود علشان التاني يحبه بالعافية او شايف ان لو حبه هيكونوا سعداء، ده اسمه ذل مش حب.
– مفيش حد هنلاقيه كامل وفيه كل المواصفات اللي اي شخص بيحلم بيها ولكن العيوب على الاقل نكون متقبلينها ومتكونش عبء علينا بالعكس تكون حاجة حلوة بتضيف لحياة الشريك الثاني.
– محدش يحاول يغير حد، اي شخص هتحبه وتدخل حياته يا تقبله زي ما هو يا اما تسيبه وبلاش تتعبوا بعض.
– السلبية والتجاهل اوحش ما يكون وبيقضي ع اي علاقة مهما كانت ناضجة وناجحة.
– الخلفة مش هدف، لانن فيه ناس بتخلف كتير وبتربي غلط وبتطلع جيل معقد في كل حاجة ف حياته مش نفسيا بس.
– نحب ونمسك في اللي بيحبنا وقادر يتقبلنا زي ما احنا بكل اللخبطة والعقد والكلاكيع اللي جوانا، علشان نكون سند لبعض مش عبء على بعض.
– لما نلاقي حد زعلان ومضايق نسمعه ونخفف عنه ونقف جنبه، مش نزعل معاه ونعلي على زعله كمان، لأن دي أنانية وبتولد كره وغضب.
– أي أب وأم لازن يقربوا من ولادهم ويسمعوهم، الزعل والغضب مفيهوش حاجة اسمها عيال مهمل كان سنهم.
– اللي مش قد التربية ميخلفش، لو حياتك فيها حاجات أهم اهتم بيها لكن متظلموش عيالكم معاكم.
– لما تلاقي شخص شخصيته مش عجباك متتقريش عليه او تقلل منه، يا تساعده وتفهمه وتقف جمبه يا تسيبه وتبعد عنه.
يمكن الكلام عن مسلسل «خلي بالك من زيزي» مليان تفاصيل وملعومات مهمة محتاجة مجموعة مقالات للحديث عنها، ولكن المسلسل أضاف أثر جميل في نفس كل واحد اتفرج عليه سواء قوة، أو القدرة على المواجهة، التغلب على الرهبة، الثقة بالنفس، وده يخليني أقول وبكل ثقة أنه من أفضل المسلسلات اللي اتعرضت من سنين طويلة وليس رمضان هذ العام فقط.
