رأيك

عبير العبد تكتب: كفاية لف ودوران

صوت جوانا كلنا بيقولنا كفايه لف ودوران في كل لحظة في حياتنا، نصحى الصبح نقول صباح الفل وتكون قلوبنا شايله، طب ليه، ما نصفي قلوبنا وكفاية صباح الخير مش لازم فل.

تيجى تفطر، تبص على كل زمايلك بيفطروا ايه الاول، وأنت مالك، شوف أنت نفسك تغير ريقك على ايه واشتريه وكل بالهنا والشفا من غير ماتبص على حد ولا تقلد حد ولا تلف وتدور وتبحث مين بيفطر ايه وتعمل زيه عشان متبقاش أقل من حد، يعنى ربنا خلقنا درجات وأنت جاى تعملنا اسطمبة واحدة ياقادر.

تيجي تكتب موضوع تقعد تدور على مصادر أحسن وأشيك من مصادر موضوع زميلك وتلف وتدور عليه عشان تاخد ارقامهم منه ومتقولوش أنك عايز تعمل موضوع أحسن من موضوعه، طيب ما تفكر وتعمل فكره جديدة بدل ما تلف تدور وتاخد افكار زمايلك ومصادرهم وتضربهم في ضهرهم ومؤامرات وشغلانه، اتقوا ربنا فى نفسكم وبلاش لف ودوران.

ولا اللف والدوران اللى بقا عند الاطفال اتعدوا من الكبار، يبقى عايز لعبه ويقعد يعمل خطط استراتيجيه عشان يوقع ابوه وامه وجدته وجده فى الخيه ويلموا من بعض عشان يراضوه ويجبولوا اللعبه ،حتى الاطفال أصيبوا بمرض اللف والدوران.

ولا كمية اللف والدوران اللى بلاقيها فى البيع والشرا ولا فى التعاملات عموما فى الشارع والاماكن العامه وفى اى مصلحه بتخلص فيها ورقه ويطلع عينك ،بسبب اللف والدوران من المختص، فى حين انه لو كان مباشر وواضح هيوفر الجهد والمال من الأول والواحد يخلص ورقه، لكن إزاى لازم يلف ويدور عشان يشبع المريض بداخله ومش مهم المواطن،لكن من رحمة ربنا ان لسه فيه قله اصحاء ولم يصابوا بداء اللف والدوران.

ما تيجوا دوغرى وتتكلموا بوضوح فى كل سطر من سطور أيامكم وتخليكوا مباشرين وصادقين وبطلوا لف ودوران ومؤامرات وحوارات ونفسنه، كل ده زود الامراض المزمنه بطريقه ملحوظة.

الانسان الصادق مع نفسه ومع اللى حواليه ومحدد اهداف حياته وطموحاته بيوصل اسرع ولما يوصل بتكون حقيقه وبيلمس اهدافه ويفرح بنجاحه لانه بيكون مرتاح البال لا لف ولا دار ولاكذب ولا اتنازل ولا فرط ولا طلع على كتف حد وبالتالى سعادته بتبقى حقيقية بنجاحه وبيكون فى حالة سلام واحترام مع نفسه ومع كل اللى حواليه ولو قابل رب كريم بيبقى مرتاح حتى فى الآخرة باذن ورحمة ربنا ..كفايه لف ودوران وارحموا نفسكم عشان ربنا يرحمكم.

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock