أسماء الصغير تكتب: الأربعين الفرفوشة

في سن الأربعين، بتحس إن في زرار جواك اتضغط فجأة، زرار “كبر دماغك”، المشاكل اللي كنت بتزعلك في العشرينات والتلاتينات بقت دلوقتي مجرد حاجات تضحك، الحاجات اللي كنت بتشيل همها، بقت مجرد نكتة تتحكي ، خناقة على كلمة، دموع على موقف تافه، وتفاجأ إنك بقيت شخص تاني خالص.
مش لأن الحياة بقت سهلة، بس لانك بقيت فاهم إن في حاجات كتير ما تستاهلش طاقتك ولا وقتك، اتعلمت إن الراحة أهم من أي جدال، وإن الضحك بقى العلاج الوحيد لكل حاجة، بتتعلم إنك تعدي مش ضعف، بس لأنك عرفت قيمة نفسك وإنك مش مضطر ترد على كل كلمة، ولا تعاند على كل حاجة، بتضحك وتسيب الدنيا تعدي.

سن الأربعين بيخليك تدور على راحة بالك، وتسيب اللي يزعل يزعل، بتكتشف إنك قضيت سنين بتعمل حساب لمشاكل مالهاش وجود، بتبدأ تحس إنك عايز تعيش مرتاح، تبسط نفسك، وتبعد عن أي حاجة توجع دماغك و بتختار الناس اللي حواليك بعناية ، و تسيب أي علاقة مرهقة، وتتمسك بالناس اللي وجودهم بيفرح قلبك ، والأجمل أنك تلاقي نفسك بتعرف تقول “لأ” من غير خوف، وتعرف تقول “آه” للحاجات اللي تسعدك من غير تفكير طويل ، وهنا بس تعرف إنك وصلت لمرحلة الفرفشة الحقيقية.