عبير العبد تكتب : الشاطرة تغزل برجل حمار
مفيش حاجه تقدر توقف الست الشاطرة عن الحياة مهما حصل ومهما ضعفت امكانياتها لان القوة الداخلية للمرأة فولازية وخارقه وقادرة على هزيمة اى عقبات او مشاكل أو أى قلق من أى نوع يمرر الحياة .
يعنى الشاطرة تغزل برجل حمار ماتستناش حد يسندها..هى بتسند نفسها باى شكل قادرة الشاطرة تقوم بكل الحلول الممكنه والمستحيلة علشان تستمر الحياة ..عن تجربة..بالفعل الست جواها قوة رهيبه ..بتطلع وقت الشده ويظهر مارد قوته تهد الجبال وتشق كل الصعاب بقدرة يصعب وصفها او حتى تصورها وتلاقى نفسك فى تحدى غريب يولد افكار لم تكن متوقعه على الاطلاق ويطلع منك ابداع غير متوقع من كل الناس اللى حواليكى وكلمة تغزل برجل حمار ..يعنى تقدرى تعملى حاجات بادوات لا يتصور حد انها تستخدم فى اخراج ابداعك بهذا الشكل .
لا والمدهش أن كل العقبات المستحيلة الهزيمة على مر كل العصور فشلت فى هزيمة المرأة ومازالت المجتمعات لاتعترف بقوة المرأة ولكنها منحها الله قوة لاتقهر حفاظاً على بقاء الحياة لانها هى الحياة .
سيدتى واختى وبنتى وصديقتى المرأة ..قوتك لا حدود لها ..لا تتوقفى وقولى المثل ده فى سرك دايما “الشاطرة تغزل برجل حمار ” واغزلى نجاحك فى كل المجالات ،حتى لو انعدمت ادواتك لا تتوقفى عن النجاح مهما حصل..
عزيزتى الفتاة انتى العمود الفقرة لحياة المجتمع وقوتك هى قوة المجتمع ولا تبالى لكل المهاترات الهادمة التى تتعالى من وقت الى آخر.
اذكرك سيدتى حواء أن الله خلق الأنثى لتكون السند والظهر لنجاح البشرية فى تعمير الارض ولتكون سر نجاح الرسالات السماوية ..خديجة رضى الله عنها ساندت الإسلام كانت السند لمحمد صلى الله عليه وسلم ومريم تحملت الكثير وساندت المسيحيةوكانت السند لعيسى عليه السلام، وأسيا احتضنت موسي وساندت اليهودية من بطش فرعون.
